Gweithdrefnau Arbennig
Triniaethau arbennig – tystysgrif mangre
Bydd y cynllun trwyddedu newydd yn ei gwneud yn ofynnol bod pob mangre wedi’i chymeradwyo neu bob cerbyd wedi’i gymeradwyo lle mae unrhyw un o'r triniaethau arbennig penodedig (aciwbigo, tyllu'r corff, electrolysis a/neu datŵio) yn cael ei rhoi gan ymarferwyr trwyddedig. Bydd y dystysgrif gymeradwyo yn cael ei dyroddi i'r person sy'n gyfrifol am y busnes mewn mangre (gall hyn fod y perchennog, y rheolwr neu’r ymarferydd – nid oes angen iddo fod yn rhoi'r triniaethau ei hun ac efallai nad yw’n cyflogi ymarferwyr yn uniongyrchol). Os yw’r ymarferwr yn meddu ar drwydded triniaeth arbennig ond ei fod yn gyflogai, neu ei fod yn rhentu cadair/ystafell ym musnes rhywun arall, yna nid oes angen iddo feddu ar ei dystysgrif gymeradwyo ei hun ar gyfer mangre/cerbyd, ond rhaid iddo barhau i wneud yn siŵr mai dim ond mewn mangre neu gerbyd a gymeradwywyd y mae’n gweithredu.
Sut i wneud cais
Ceisiadau oddi wrth mangreoedd newydd
Ni fydd mangreoedd/cerbydau newydd nad ydynt eisoes wedi’u cofrestru o dan Ddeddf 1982 ar y dyddiad dod i rym, sef 29 Tachwedd 2024, yn gymwys ar gyfer y trefniadau pontio. Ni ellir defnyddio’r mangreoedd hyn ar gyfer unrhyw un o’r triniaethau arbennig penodedig nes eu bod wedi’u cymeradwyo (a phan fo’n gymwys, nes bod yr ymarferwyr wedi’u trwyddedu) o dan y cynllun newydd.
Ceisiadau oddi wrth mangreoedd sydd eisoes wedi’u cofrestru
Bydd yn ofynnol i fangre sydd wedi'i gofrestru ar hyn o bryd o dan ofynion presennol Deddf Llywodraeth Leol (Darpariaethau Amrywiol) 1982 wneud cais am ei thystysgrif cymeradwyo mangre ei hun ac, os oes angen, drwydded triniaeth arbennig.
Bydd gan y rhai sy’n gyfrifol am fusnes, pan fo gan y fangre gofrestriad eisoes, tan 28 Chwefror 2025 i gyflwyno cais am gymeradwyaeth, a byddant yn elwa ar drwydded bontio. Bydd cael y gymeradwyaeth bontio hon yn caniatáu i fangreoedd presennol weithredu busnes triniaethau arbennig yn unol â’u dogfen gofrestru gyfredol, tra bo’r cais am drwydded newydd yn cael ei brosesu (rhaid i ymarferwyr hefyd fod wedi’u trwyddedu neu fod â sicrwydd yswiriant o dan y trefniadau pontio hyn i roi unrhyw driniaeth arbennig yn y mangreoedd hyn).
Bydd trwydded bontio neu dystysgrif gymeradwyo yn cael ei dyroddi’n awtomatig i bob mangre ac ymarferydd cofrestredig presennol, ac ni fydd yn ofynnol i chi wneud cais am hyn.
Rhaid gwneud cais am gymeradwyaeth o dan y cynllun newydd o fewn y cyfnod hwn o dri mis (29 Tachwedd 2024 – 28 Chwefror 2025).
Os na fydd cais wedi’i wneud am dystysgrif gymeradwyo ar gyfer mangre/cerbyd erbyn diwedd y cyfnod pontio o dri mis, yna ni fydd caniatâd cyfreithiol mwyach i’r fangre hon gael ei defnyddio gan ymarferwyr i roi unrhyw un neu ragor o’r triniaethau arbennig penodedig. Ni fydd unrhyw eithriadau i'r gofyniad i gael tystysgrif gymeradwyo ac ni fydd unrhyw estyniadau i’r cyfnod pontio hwn.
Ffioedd
Cynigir y ffioedd isod ar gyfer pob tystysgrif gymeradwyo, pob tystysgrif gymeradwyo dros dro neu ar gyfer amrywiadau eraill. Nid yw cais yn cael ei drin fel cais sydd wedi’i wneud nes bod ffi’r cais wedi dod i law ac wedi clirio.
- Newydd Tystysgrif gymeradwyo ar gyfer mangre (tair blynedd). £385
- Mangre/cerbyd a gymeradwywyd – cymeradwyaeth dros dro (digwyddiad ategol) £385
- Mangre/cerbyd a gymeradwywyd – cymeradwyaeth dros dro (confensiwn/prif ddiben) £680
- Amrywio tystysgrif gymeradwyo ar gyfer mangre/cerbyd (ychwanegu triniaeth) £189
- Amrywio tystysgrif gymeradwyo ar gyfer mangre/cerbyd (newid strwythurol) £189
- Amrywio tystysgrif gymeradwyo ar gyfer mangre/cerbyd (newid manylion) £26
Cyfnod trwydded
Mae'r dystysgrif gymeradwyo ar gyfer mangre yn para am gyfnod o dair blynedd o ddyddiad dyroddi'r drwydded. Mae tystysgrifau dros dro yn ddilys am ddim mwy na saith diwrnod.
Cymhwysedd
Rhaid i'r ymgeisydd fod yn 18 oed neu'n hŷn.
Ni fydd unrhyw un nad yw wedi cyflwyno cais cyflawn erbyn diwedd y cyfnod pontio, hy 28 Chwefror 2025, yn gallu ymarfer yn gyfreithlon. Ni fydd unrhyw eithriadau i’r gofyniad i gael trwydded/tystysgrif ac ni fydd unrhyw estyniadau i’r cyfnod pontio hwn. Rhaid cyflwyno’r cais i licensing@pembrokeshire.gov.uk gyda’r canlynol Ar ôl y dyddiad hwn bydd unrhyw gais yn cael ei brosesu fel pe bai’n gais newydd ac ni fydd ymarferwyr yn gallu rhoi unrhyw driniaethau yn gyfreithlon nes bod trwydded wedi cael ei chymeradwyo
Dogfennaeth ategol
Rhaid i’r canlynol ddod gyda’r cais:
- Plan o fangre/cerbyd (rhaid iddo gynnwys: y mynedfeydd i’r fangre ac i unrhyw ystafelloedd a’r allanfeydd ohoni neu ohonynt, mesuriadau a siâp unrhyw ystafell sydd yn y fangre a lleoliad sinciau cyfarpar, biniau offer miniog, ystafelloedd staff, mannau/cyfleusterau/ystafelloedd storio ar gyfer cynhyrchion a chyfarpar, toiledau, mannau/ystafelloedd aros, basnau golchi dwylo, biniau gwastraff, ffenestri a gweithfannau).
- Tystiolaeth o sicrwydd yswiriant dilys sydd gan yr ymgeisydd mewn cysylltiad â'r fangre neu'r cerbyd.
- Tystiolaeth bod yr ymgeisydd wedi cwblhau Dyfarniad Lefel 2 a reoleiddir (atal a rheoli heintiau) yn llwyddiannus.
Prosesu ac amserlenni
Bydd ceisiadau newydd yn cael eu prosesu o fewn yr amserlenni a nodir yng nghanllawiau statudol/anstatudol Llywodraeth Cymru.
Bydd ceisiadau gan fangreoedd cofrestredig presennol, sy’n gwneud cais am dystysgrif gymeradwyo ar gyfer mangre o fewn y cyfnod pontio o dri mis, yn cael eu prosesu o fewn tri mis i ddiwedd y cyfnod pontio hwn, neu’n gynharach (hy chwe mis o’r dyddiad dod i rym).
Deddfwriaeth ac amodau
Mae’r Rheoliadau drafft sy’n cynnwys gofynion ac amodau penodol ar gyfer mangreoedd ar gael yn Rheoliadau Mangreoedd a Cherbydau a Gymeradwywyd o ran Triniaethau Arbennig (Cymru) 2024 (yn agor mewn tab newydd)
Y rheoliad trosfwaol sy’n nodi’r fframwaith cyfreithiol ar gyfer triniaethau arbennig a gofynion cyfreithiol eraill yw Deddf Iechyd y Cyhoedd (Cymru) 2017 (Rhan 4) (yn agor mewn tab newydd)
Cysylltwch â ni
Os oes gennych unrhyw ymholiadau ynghylch y cynllun trwyddedu triniaethau arbennig, anfonwch e-bost at healthandsafety@pembrokeshire.gov.uk
Os oes gennych unrhyw ymholiadau am hynt eich trwydded neu am gyflwyno cais, anfonwch e-bost at licensing@pembrokeshire.gov.uk
Arweiniad pellach
Cwestiynau cyffredin
Cwestiynau cyffredin / gwybodaeth arall
Mae’r adran hon yn rhoi manylion ynghylch rhai o’r cwestiynau cyffredin sydd wedi dod i law yn ogystal â rhywfaint o wybodaeth arall am y cynllun trwyddedu newydd ar gyfer triniaethau arbennig. Mae’n bosibl y caiff rhagor o wybodaeth ei hychwanegu at y dudalen hon yn rheolaidd, yn ôl yr angen. Gall yr wybodaeth isod newid, ac mae’n seiliedig ar y cynigion presennol a’r wybodaeth sydd ar gael.
Cofrestr genedlaethol ar gyfer mangreoedd ac ymarferwyr
Bydd y Ddeddf yn ei gwneud yn ofynnol i awdurdodau lleol gadw a chyhoeddi cofrestr (Yn agor mewn ffenestr newydd) o’r holl drwyddedau triniaeth arbennig sy’n ddilys ar hyn o bryd ac o’r holl dystysgrifau ar gyfer mangre/cerbyd sydd wedi’u cymeradwyo. Bydd hwn ar gael i aelodau'r cyhoedd ei weld.
Hyfforddiant rheoli heintiau
Mae’n ofynnol o dan y cynllun newydd i ymgeiswyr allu dangos tystiolaeth eu bod wedi cwblhau Dyfarniad Lefel 2 mewn Atal a Rheoli Heintiau ar gyfer Ymarferwyr Triniaethau Arbennig yn llwyddiannus. Rhaid eich bod wedi llwyddo yn y cwrs hwn cyn i chi wneud cais. Ni fydd cymwysterau rheoli heintiau presennol yn cael eu derbyn, oni bai eu bod yn bodloni'r gofynion (cwrs Lefel 2 a reoleiddir gan Gymdeithas Frenhinol er Iechyd y Cyhoedd).
I gael rhestr lawn o ddarparwyr sy'n cynnig y cymhwyster hwn gallwch fynd i wefan y Gymdeithas Frenhinol er Iechyd y Cyhoedd (yn agor mewn tab newydd).
Ymarferwyr nad ydynt yn preswylio yng Nghymru
Dim ond yng Nghymru y mae’r cynllun newydd yn berthnasol, ond bydd yn ofynnol i’r ymarferwyr hynny sy’n byw y tu allan i Gymru ond sy’n gweithio yng Nghymru gydymffurfio â’r cynllun newydd. Bydd naill ai’n golygu bod angen trwydded triniaeth arbennig dros dro (os ymarferir yn anaml ac am ddim mwy na saith diwrnod), neu drwydded triniaeth arbennig am dair blynedd. O dan yr amgylchiadau hyn, bydd cais yn cael ei wneud i'r awdurdod lleol y mae'r ymarferydd dibreswyl yn bwriadu gweithio yn ei ardal, neu y bydd yn gwneud y rhan fwyaf o'i waith yn ei ardal os yw’n gweithio mewn mwy nag un ardal awdurdod lleol.
Ymarferwyr sy’n gweithio mewn mwy nag un awdurdod lleol yng Nghymru
Bydd angen i berson wneud cais i'r awdurdod lleol y mae'n rhoi ei driniaethau arbennig yn ei ardal. Os ydych yn ymarfer mewn mwy nag un ardal awdurdod lleol (yng Nghymru), dylech wneud cais i’r awdurdod lleol yr ydych yn cynnal y rhan fwyaf o’ch triniaethau arbennig yn ei ardal. Mae’r drwydded triniaeth arbennig, pan gaiff ei dyroddi, yn ddilys ar gyfer Cymru gyfan, cyhyd ag y bo tystysgrif cymeradwyo mangre wedi’i rhoi a bod y fangre honno wedi’i rhestru ar drwydded triniaeth arbennig yr ymarferydd, neu y cyfeirir at y fangre honno ar y drwydded honno.
Yn achos trwyddedau triniaeth arbennig dros dro (saith diwrnod), bydd y rhain yn cael eu cyfyngu i ddigwyddiad penodol a/neu amserlen benodol. Bydd hyn yn golygu bod rhaid gwneud cais newydd ar gyfer pob digwyddiad ar wahân (oni bai bod gan yr ymarferydd drwydded tair blynedd).
Cylchlythyrau a gweminarau Iechyd Cyhoeddus Cymru
Mae cylchlythyrau a gweminar triniaethau arbennig Iechyd Cyhoeddus Cymru ar gael ar Iechyd Cyhoeddus Cymru (yn agor mewn tab newydd) .
Cysylltwch â ni
Os oes gennych unrhyw ymholiadau ynghylch y cynllun trwyddedu triniaethau arbennig, anfonwch e-bost at healthandsafety@pembrokeshire.gov.uk
Os oes gennych unrhyw ymholiadau am hynt eich trwydded neu am gyflwyno cais, anfonwch e-bost at licensing@pembrokeshire.gov.uk
Cyfundrefn drwyddedu newydd ar gyfer tatŵio, tyllu’r corff ac electrolysis yng Nghymru
O 29 Tachwedd 2024 ymlaen, rhaid i bob ymarferydd a sefydliad gydymffurfio â’r Rheoliadau Cymreig newydd er mwyn sicrhau diogelwch y cyhoedd a chynnal safonau proffesiynol.
Bydd yn ofynnol i bob mangre ac ymarferydd sy’n cynnig triniaeth arbennig fel y’i diffinnir gan Ddeddf Iechyd y Cyhoedd (Cymru) 2017 (yn agor mewn tab newydd)
- Aciwbigo
- Tyllu'r corff
- Electrolysis
- Tatŵio (gan gynnwys colur lled-barhaol/microlafnu)
gael trwydded. Mae'r gyfundrefn drwyddedu yn disodli'r cynllun cofrestru presennol.
Bydd trefniadau pontio ar gyfer unrhyw gofrestriadau cyfredol.
Beth sydd angen i chi ei wybod
Trosolwg o'r gyfundrefn drwyddedu
Nod y drefn drwyddedu newydd yw:
- Diogelu iechyd a diogelwch cleientiaid
- Rheoleiddio safonau hylendid a diogelwch mewn arferion tatŵio, tyllu’r corff ac electrolysis
- Sicrhau bod ymarferwyr yn gymwys ac wedi'u hyfforddi
- Hyrwyddo proffesiynoldeb o fewn y diwydiant
Gofynion allweddol ar gyfer busnesau
Cais am drwydded
Rhaid i bob person a mangre wneud cais am drwydded. Gwnewch yn siŵr eich bod yn cyflwyno'ch cais ymhell cyn y dyddiad cau er mwyn osgoi unrhyw darfu ar eich busnes.
Safonau iechyd a diogelwch
Rhaid i sefydliadau gydymffurfio â rheoliadau iechyd a diogelwch llym, gan gynnwys cynnal amgylchedd glân, defnyddio offer wedi'i sterileiddio, a dilyn dulliau gwaredu gwastraff priodol.
Cymwysterau ymarferwyr
Rhaid i bob ymarferydd feddu ar gymwysterau perthnasol a dangos cymhwysedd.
Cydsyniad gan y cleient
Gwnewch yn siŵr bod cleientiaid yn cyflwyno ffurflenni cydsynio priodol cyn unrhyw driniaeth. Mae hyn yn amddiffyn eich busnes a'r cleient.
Archwiliadau rheolaidd
Dylech ddisgwyl archwiliadau cyfnodol gan yr adran Iechyd a Diogelwch er mwyn sicrhau cydymffurfedd â safonau trwyddedu. Mae’n hanfodol cynnal safonau uchel bob amser.
Trwydded triniaeth arbennig
Bydd y cynllun trwyddedu newydd yn ei gwneud yn ofynnol i ymarferwyr sy'n rhoi unrhyw driniaeth arbennig (aciwbigo, tyllu'r corff, electrolysis a/neu datŵio) ar rywun arall yng Nghymru gael trwydded. Bydd y drwydded yn pennu pa driniaeth(au) arbennig y mae'r ymarferydd wedi'i drwyddedu i'w hymarfer, yn ogystal â rhestru'r fangre y mae'r ymarferydd yn gweithredu ynddi. Rhaid i bob ymarferydd gael ei drwydded ei hun. Dim ond mewn mangreoedd/cerbydau a gymeradwywyd y gall ymarferwyr trwyddedig weithredu.
Bydd yn drosedd i ymarferydd roi triniaeth arbennig heb drwydded neu roi unrhyw driniaethau o fangreoedd neu gerbydau nad ydynt wedi'u cymeradwyo. Bydd hefyd yn drosedd i beidio â chydymffurfio â'r gofynion penodol a nodir yn y rheoliad ar gyfer ymarferwyr a mangreoedd/cerbydau.
Sut i wneud cais
Ceisiadau gan ymarferwyr nad ydynt wedi cofrestru eisoes
Ni fydd ymarferwyr newydd nad ydynt eisoes wedi'u cofrestru o dan Ddeddf 1982 ar 29 Tachwedd 2024 yn gymwys ar gyfer y trefniadau pontio. Ni chaniateir i’r ceiswyr hyn fasnachu/ymarfer nes eu bod wedi’u trwyddedu (a, phan fo’n berthnasol, bod eu mangre wedi’i chymeradwyo/cerbyd wedi’i gymeradwyo) o dan y cynllun newydd.
Dim ond ar neu ar ôl 29 Tachwedd 2024 y gellir cyflwyno ceisiadau newydd.
Ceisiadau gan ymarferwyr sydd eisoes wedi’u cofrestru
Bydd yn ofynnol i ymarferwyr sydd wedi'u cofrestru ar hyn o bryd o dan ofynion presennol Deddf Llywodraeth Leol (Darpariaethau Amrywiol) 1982 wneud cais am eu trwydded triniaeth arbennig eu hunain ac, os oes angen, dystysgrif gymeradwyo ar gyfer mangre/cerbyd.
Bydd gan y rhai sydd â chofrestriadau presennol hyd at 28 Chwefror 2025 i gyflwyno cais am drwydded a byddant yn elwa ar drwydded bontio. Bydd y drwydded bontio hon yn caniatáu i ymarferwyr presennol barhau i roi triniaethau arbennig (yn unol â’u dogfen gofrestru gyfredol), tra bo’r cais am drwydded newydd yn cael ei brosesu.
Bydd trwydded bontio neu dystysgrif gymeradwyo yn cael ei dyroddi’n awtomatig i bob mangre ac ymarferydd cofrestredig presennol, ac ni fydd yn ofynnol i chi wneud cais am hyn.
Rhaid gwneud cais am drwydded o dan y cynllun newydd o fewn y cyfnod hwn o dri mis.
Ni fydd unrhyw un nad yw wedi cyflwyno cais cyflawn erbyn diwedd y cyfnod pontio, hy 28 Chwefror 2025, yn gallu ymarfer yn gyfreithlon. Ni fydd unrhyw eithriadau i’r gofyniad i gael trwydded/tystysgrif ac ni fydd unrhyw estyniadau i’r cyfnod pontio hwn. Rhaid cyflwyno’r cais i licensing@pembrokeshire.gov.uk gyda’r canlynol Ar ôl y dyddiad hwn bydd unrhyw gais yn cael ei brosesu fel pe bai’n gais newydd ac ni fydd ymarferwyr yn gallu rhoi unrhyw driniaethau yn gyfreithlon nes bod trwydded wedi cael ei chymeradwyo.:
Dogfennaeth ategol
- Y ffi ymgeisio sydd i’w thalu drwy Fy Nghyfrif
- Un ffotograff lliw ar ffurf llun pasbort gyda’r wyneb yn llawn
- Tystiolaeth o sicrwydd yswiriant dilys mewn cysylltiad â rhoi triniaeth arbennig
- Tystiolaeth o dystysgrif datgeliad sylfaenol diweddar (o’r Gwasanaeth Datgelu a Gwahardd) – nad yw’r dyddiad dyroddi yn gynharach na thri mis cyn dyddiad cyflwyno’r cais cyflawn
- Datganiad o droseddau perthnasol (fel y nodir yn y Ddeddf)
- Tystiolaeth o gwblhau Dyfarniad Lefel 2 a reoleiddir (atal a rheoli heintiau) yn llwyddiannus
- Gwirio enw a dyddiad geni (ee pasbort, trwydded yrru ac ati)
- Gwirio cyfeiriad preswyl presennol (ee trwydded yrru, llythyr treth gyngor, bil cyfleustodau)
Ffioedd
Mae'r ffioedd isod wedi'u cymeradwyo ar gyfer pob trwydded, trwydded dros dro neu ar gyfer amrywiadau eraill. Nid yw cais yn cael ei drin fel cais sydd wedi’i wneud nes bod ffi’r cais wedi dod i law ac wedi clirio.
- Trwydded triniaeth arbennig (tair blynedd) £203
- Trwydded triniaeth arbennig dros dro (saith diwrnod ar y mwyaf) £92
- Amrywio trwydded triniaeth arbennig (ychwanegu triniaeth newydd) £131
- Amrywio trwydded triniaeth arbennig (newid manylion) £26
- Cael trwydded triniaeth arbennig newydd £13
Cysylltwch â ni
Os oes gennych unrhyw ymholiadau ynghylch y cynllun trwyddedu triniaethau arbennig, anfonwch e-bost at healthandsafety@pembrokeshire.gov.uk
Os oes gennych unrhyw ymholiadau am hynt eich trwydded neu am gyflwyno cais, anfonwch e-bost at licensing@pembrokeshire.gov.uk
Gwybodaeth bellach
Cymdeithas Brydeinig y tyllwyr corff proffesiynol, yr UK (yn agor mewn tab newydd)